Si çdo javë, emisioni “Super Trend” me Drilona Shala dhe Mirdon Pacolli sjell intervista interesante e muzikë të bukur. Edhe sonte ishte një mbrëmje e tillë.
I ftuar në emision ishte Enur Pakashtica, një muzicient, moderator e autor emisionesh që njihet nga publiku për një kohë të gjatë.
Pakashtica gjatë emisionit përformoi disa këngë shumë të njohura duke i shoqëruar me kitarë. E sa i përket projekteve të tij, ai deklaroi se ka një këngë që e ka të përfunduar tash e 1 vit, dhe vetëm po pret momentin e duhur që t’ia punojë edhe videoklipin dhe ta publikojë. Pakashtica shtoi se kjo është një këngë e zhanrit të tij, këngë e lehtë dashurie.
Lidhur me profesionin tjetër, ai tregoi se është ndjerë emocional me përfundimin e emisionit “Wazzup”, të cilin ai e kishte udhëhequr për 1.700 episoda. Megjithatë ai u shpreh i kënaqur me projektin e tij të ri televiziv, “A po m’njeh zemër”, teksa përvoja e tij në televizion tashmë po arrin një dekadë.
Projektet televizive dhe biznesi privat, duke qenë kjo posta “Mik Mik” ku Pakashtica është pronar, i kanë limituar shumë kohën që të përfomojë muzikën e tij, të cilën e cilëson ushqim për shpirtin e tij. Megjithatë i pyetur për rëndësinë që të dyja kanë në jetën e tij, ai nuk ka mundur t’i ndajë, duke thënë se të dyja këto i ofrojnë gjëra të ndryshme atij.