Chelsea ka nënshkruar me mesfushorin Enzo Fernandez nga Benfica, për një rekord britanik prej 106.8 milionë funtesh.
Marrëveshja për argjentinasin tejkalon 100 milionë funte që Manchester City pagoi për Jack Grealish nga Aston Villa, 18 muaj më parë.
22-vjeçari, i cili iu bashkua Benfica-s verën e kaluar për rreth 10 milionë funte, ka nënshkruar një marrëveshje tetëvjeçare e gjysmë në Stamford Bridge, për ta mbajtur atë në klub deri në verën e vitit 2031.
Chelsea kishte qenë në bisedime për të nënshkruar me fituesin e Kupës së Botës gjatë gjithë janarit, por Benfica kishte refuzuar të bënte biznes nëse Blutë nuk paguanin klauzolën e tij të lirimit prej 120 milionë euro, raporton Sky Sports.
Por, Chelsea ra dakord për një marrëveshje prej 121 milionë eurosh, pas 12 orë bisedimesh të udhëhequra nga bashkëpronari i Chelseas, Behdad Eghbali nga Londra.
Blutë do të paguajnë këstin e parë prej 30 milionë funtesh, ndërsa pjesën tjetër të tarifës do ta paguajnë në pesë këste të tjera.
Fernandez u la jashtë skuadrës së Benfica-s për ndeshjen e tyre kundër Arouca të martën mbrëma, me 22-vjeçarin që iu nënshtrua testeve mjekësore në Portugali përpara kalimit të tij në Stamford Bridge.
Fernandez thuhet se do të fluturojë për në Londër të mërkurën më 1 shkurt.
Reprezentuesi argjentinas do të jetë një shtesë e mirëpritur për skuadrën e Graham Potter, i cili ka pasur vështirësi në fillim të sezonit dhe po përballet me detyrën e vështirë për të siguruar futbollin e Champions League.
Ai iu bashkua Benfica-s për 10 milionë funte dhe e ka përfaqësuar klubin 25 herë, duke shënuar tre gola pas lëvizjes së tij nga River Plate në korrik 2020.
Fernandez shënoi 12 herë dhe regjistroi 10 asistime në 53 ndeshje për skuadrën argjentinase të Primera Division përpara se të transferohej në Evropë.