Pas deklarimeve dhe kritikave të të dërguarit të posaçëm të Shteteve të Bashkuara të Amerikës për Ballkanin Perëndimor, Gabriel Escobar, kundrejt Qeverisë së Kosovës, ka reaguar deputeti i PDK-së, Enver Hoxhaj.
Duke potencuar se qëndrimi amerikan është duke u përkeqësuar me Qeverinë Kurti, Hoxhaj ka thënë se vendimi për tokat rreth Manastirit të Deçanit “shkoi huq”.
Deputeti i PDK-së ka shtuar se diplomacia kosovare është kthyer ofiqari për dinarë e kadastra.
“Qëndrimi amerikan është duke u përkeqësuar, derisa edhe aleatët kryesorë evropianë janë në kulm të pakënaqësive me Qeverinë Kurti. Fakti që vendimi për tokat e manastirit shkoi huq, tregon për një amatorizëm dhe një moskoordinim eklatant me aleatët shtetbërës të Republikës së Kosovës.
Deklaratat e pamatura dje, sot morën një dush të ftohtë. Mosbesimi është thelluar aq shumë me aleatët, sa që diplomacia jonë është krejtësisht e izoluar dhe joefektive. Nuk po flitet më për njohje dhe anëtarësime në diplomaci me aleatët, po për dinarë e për kadastra! Kjo tregon që politika e jashtme është kthyer në ofiqari për dinarë e për kadastra”, ka shkruar Hoxhaj në Facebook.
Sipas Hoxhajt, “përkeqësimi” i marrëdhënieve me aleatët e Kosovës është përgjegjësi ekskluzive e Qeverisë Kurti.
“Përgjegjësia e plotë i takon kësaj qeverie! Do mbesim pa aleatë me këtë ritëm të tmerrshëm të gabimeve! Por, Kosova nuk do t’ia kthej shpinën aleatëve, por kësaj qeverie anti-historike”, ka shtuar më tej Hoxhaj.
Çka tha Escobar-i
Në një intervistë për Radio Evropa e Lirë, emisari amerikan ka thënë se ka shumë zhgënjim me këtë Qeveri të Vetëvendosjes (VV).
Teksa u pyet se si ndihet për “refuzimet” nga kryeministri i Kosovës, Albin Kurti, Escobar thënë se nuk është hera e parë që ka zhgënjim.
Ai ka theksuar se zhgënjimi nuk është vetëm në Washington, por edhe në Bruksel, Romë, Berlin e Paris.
“Nuk është hera e parë, këtë ua them. Dhe, ka shumë zhgënjim me këtë Qeveri të Vetëvendosjes – jo vetëm në Uashington, por në Bruksel, në Romë, Berlin dhe Paris gjithashtu. Ne, përderisa i afrohemi 25-vjetorit të aksionit të NATO-s, është e rëndësishme që njerëzit ta kuptojnë që forca e marrëdhënies ndërmjet Shteteve të Bashkuara dhe Kosovës është mes njerëzve”, ka deklaruar Escobar.