Etiopia dhe Eritrea kanë ndërprerë marrëdhëniet diplomatike, pasi Addis Ababa ka akuzuar vendin fqinj për përfshirje në rifillimin e luftimeve në rajonin verior të Tigray.
Ministria e Jashtme e Etiopisë njoftoi fillimisht mbylljen e ambasadës së saj në Eritre, duke e arsyetuar vendimin me atë që i cilësoi si “akte të drejtpërdrejta dhe të tërthorta armiqësie” dhe veprime luftarake nga Eritrea kundër Etiopisë.
Etiopia gjithashtu ka shpallur 10 diplomatë eritreanë persona non grata, duke i akuzuar për përfshirje në aktivitete që, sipas autoriteteve etiopiane, përbëjnë kërcënim të drejtpërdrejtë për sigurinë kombëtare. Diplomatëve iu dhanë 48 orë kohë për të lënë vendin.
Ambasada etiopiane në Eritre ishte rihapur në vitin 2018, në kuadër të afrimit mes dy vendeve. Ky proces kulmoi me afrimin diplomatik mes dy shteteve dhe me çmimin Nobel për Paqe që iu dha kryeministrit etiopian Abiy Ahmed.
Eritrea e ka cilësuar vendimin e Etiopisë si “absurd” dhe ka thënë se dëbimi i 10 diplomatëve të saj nga Addis Ababa praktikisht e kishte mbyllur ambasadën eritreane në Etiopi.
Ministria e Jashtme e Eritresë deklaroi se, për këtë arsye, “nuk kishte zgjidhje tjetër” përveçse të ndërpriste në mënyrë reciproke të gjitha marrëdhëniet diplomatike me Etiopinë.
Raportohet për shpërthime në selinë ushtarake etiopiane
Përshkallëzimi diplomatik ndodhi pas raportimeve për një shpërthim gjatë natës në selinë e forcave të armatosura etiopiane në Addis Ababa.
Agjencia AFP, duke cituar burime diplomatike dhe të sigurisë, raportoi se shpërthimi ndodhi në selinë e Forcave Kombëtare të Mbrojtjes së Etiopisë (ENDF), ndërmjet mesnatës dhe orës 01:00 sipas kohës lokale.
Burimet nuk dhanë detaje për natyrën e shpërthimit, përgjegjësit e mundshëm apo nëse kishte viktima.
Associated Press, duke iu referuar burimeve të sigurisë, raportoi për tre shpërthime që ndodhën pasi qeveria kishte ndaluar përdorimin e dronëve në kryeqytet.
Megjithatë, nuk është e qartë nëse shpërthimet ishin të lidhura me ndonjë sulm apo nëse bëhej fjalë për ushtrime ushtarake.
Luftime të reja në veri të Etiopisë
Përplasjet e armatosura janë rikthyer në rajonin e Tigrayt, ku qindra persona raportohet se janë vrarë ose plagosur që nga rifillimi i luftimeve të rënda javën e kaluar.
Përleshjet janë zhvilluar në disa fronte në veri të Etiopisë.
Eritrea ka mohuar akuzat se po mbështet një aleancë të armatosur që përfshin Frontin Popullor për Çlirimin e Tigrayt (TPLF), lëvizjen amhara Fano dhe Ushtrinë Çlirimtare Oromo (OLA). Ky koalicion është quajtur “Alliance for Survival”.
Ndërkohë, Kombet e Bashkuara kanë bërë thirrje për uljen e tensioneve dhe nisjen e bisedimeve ndërmjet qeverisë etiopiane dhe aleancës së sapoformuar.
Përshkallëzimi i ri vjen disa vite pas luftës së përgjakshme në Tigray, e cila u zhvillua nga viti 2020 deri më 2022 dhe përfshiu edhe forcat eritreane.