Lidhur me shpërthimin që ndodhi mbrëmë në “Lagjen e Boshnjakëve” në veri të vendit, ka reaguar shefi i EULEX-it në Kosovë, Giovanni Pietro Barbano.
Përmes një postimi në platformën X, shefi i EULEX-it është shprehur “plotësisht dakord” me reagimin e ambasadorit të Shteteve të Bashkuara të Amerikës në Kosovë, Jeffrey Hovenier.
Barbano ka thënë se incidente të tilla tregojnë se sa e paqëndrueshme është situata dhe se nënvizojnë nevojën urgjente për ta depërshkallëzuar.
“EULEX-i dënon çdo formë dhune si të papranueshme”, ka shkruar shefi i EULEX-it në Kosovë, Giovanni Pietro Barbano.
Fully agree with @USAmbKosovo. Such incidents show how volatile is the situation and underline the urgent need to de-escalate. EULEX’s condemn any form of violence as unacceptable. https://t.co/hth8zcgVav
— Giovanni Pietro Barbano (@EulexHoM) September 22, 2023
Më herët, ambasadori i Shteteve të Bashkuara të Amerikës në Kosovë, Jeffrey Hovenier, lidhur me këtë çështje është shprehur i tronditur.
Lexo dhe: Hovenier: Jam i tronditur nga shpërthimet në shumë pjesë të Kosovës
“I tronditur thellë kur lexova raportet për mjetet shpërthyese të përdorura në shumë pjesë të Kosovës”, ka shkruar Hovenier në platformën X.
Deeply dismayed to read reports of explosive devices used in multiple parts of Kosovo. We condemn these acts of violence and call on the authorities to conduct a thorough investigation and bring the perpetrators to justice.
— Ambassador Jeff Hovenier (@USAmbKosovo) September 22, 2023
Këtë të premte, ministri i Punëve të Brendshme, Xhelal Sveçla, ka njoftuar se sulmi me granatë dore në lagjen e boshnjakëve mbrëmë, ka ardhur si kundërpërgjigje ndaj arrestimit të tre serbëve, të cilët dyshohen për masakra e tortura ndaj shqiptarëve në Vushtri e në Burgun e Smrekonicës.
Lexo dhe: Sveçla: Sulmi me granatë dore në veri erdhi si kundërpërgjigje për arrestimin e tre serbëve
“Nga njësitet relevante të Policisë së Kosovës, pas një angazhimi të gjatë e me dyshime të bazuara, janë arrestuar 3 qytetarë serbë për krime të kryera ndaj popullatës civile gjatë luftës në Kosovë. Të njëjtit dyshohet të kenë qenë bashkëpunëtorë në tortura, plagosje, vrasje, dëbim dhe masakra ndaj shqiptarëve në Vushtrri, fshatrat e saj përreth dhe në Burgun e Smrekovnicës. Në shenjë revolte ndaj arrestimit të këtyre personave, si mesazh ndaj drejtësisë sonë dhe me qëllim të shkaktimit të terrorit te qytetarët tanë, grupe kriminale mbrëmë kanë hedhur granatë dore ushtarake në lagjen e boshnjakëve”, ka thënë ai.