Eurodeputeti nga Bullgaria, Angel Dzhambaski, ka thënë se veprimet shoviniste të presidentit të Serbisë, Aleksandër Vuçiq, i ngjajnë atyre të presidentit të Rusisë, Vladimir Putin.
Dzhambaski, përmes një postimi në llogarinë e tij në Twitter, ka thënë se Kosova është shtet i pavarur dhe se Serbia duhet ta kuptojë këtë gjë.
Po ashtu, ai shtoi se nuk duhet lejuar përshkallëzimi i situatës dhe hapja e një fronti në Ballkanin Perëndimor.
“Kosova është shtet sovran dhe Serbia duhet ta respektojë këtë. Shovinizmi i Vuçiqit i ngjan veprimeve të Putinit, por nuk duhet të lejojmë përshkallëzimin e konfliktit dhe hapjen e një fronti në Ballkanin Perëndimor”, ka shkruar ai.
#Kosovo is a sovereign state and #Serbia must respect that. Vucic's chauvinism resembles #Putin's actions, but we must not allow an escalation of the conflict and the opening of a front in the #WesternBalkans. https://t.co/sMncKMc7W1
— Джамбазки (@djambazki) January 10, 2023
Ndryshe, presidenti serb, ka thënë se KFOR-i ka refuzuar kërkesën e Serbisë për dërgimin e forcave serbe të sigurisë në Kosovë.
Në mesin e dhjetorit, autoritetet në Serbi i dërguan zyrës së misionit të NATO-s në Kosovë, KFOR, një kërkesë për dërgimin e deri në 1.000 pjesëtarëve të ushtrisë dhe policisë serbe në Kosovë.
Në një intervistë për televizionin serb, Pink, më 8 janar, ai tha se KFOR-i në përgjigjen e tij ka thënë se nuk ka nevojë për dërgimin e forcave serbe në veri.
“KFOR-i na u përgjigj se nuk ka nevojë që forcat tona të kthehen në veri të Kosovës dhe Metohisë, siç e prisnim, edhe pse sipas Rezolutës 1244 të Këshillit të Sigurimit të OKB-së nuk kanë të drejtë të refuzojnë kërkesën tonë sepse ata nuk pyeten për këtë”, tha ai.
Vuçiq tha gjithashtu se mbetet të shihet nëse Beogradi zyrtar do t’i drejtohet OKB-së që t’i kërkojë të deklarohet në seancën e Këshillit të Sigurisë.
Ai tha se nëse kjo do të bëhej, Serbia do të mbështetej nga Rusia, por rezultati do të ishte konfirmimi i vendimit të KFOR-it.
“Çfarë do të bëjmë pas asaj seance, ta lëmë (kryeministrin e Kosovës, Albin) Kurti, të komentojë se si na refuzoi edhe Këshilli i Sigurimit i OKB-së”, tha Vuçiq.