Manifestimi qendror për festën e Fitër – Bajramit është mbajtur në Xhaminë e Madhe në Prishtinë.
Manifestimi ka filluar në orën 04:50, me faljen e namazit të sabahut, pas të cilit ka filluar ligjërata tematike kushtuar kësaj feste nga profesori i Fakultetit të Studimeve Islame (FSI), Dr. Bahri Hoxha.
Namazi i Fitër – Bajramit është falur në orën 06:09, ndërsa i ka prijë kryeimami i Bashkësisë Islame të Kosovës (BIK), Vedat Sahiti.
Hytben e Fitër – Bajramit e ka mbajtur Myftiu i Kosovës, Naim Tërnava, ku i është drejtuar opinionit të gjerë me mesazhin e festës.
Ai ka thënë se mesazhi i Fitër Bajramit mbart mesazhin më të mirë për besimtarët islam, sepse afron njëri-tjetrin në festë me anë të solidaritetit
Nga ana tjetër, me rastin e festës së Fitër – Bajramit, Kryesia e BIK-ut, si tradicionalisht organizon pritje përurimi në selinë e kryesisë në Prishtinë, nga ora 9:00-12:00.
Fitër Bajrami është festa e cila bëhet pas mbarimit të muajit të Ramazanit. Emri Fitër Bajram vjen nga ajo se myslimanët para ditës së bajramit shpërndajnë lëmoshë, solidarizohen me të varfrit, kështu për ta festuar së bashku këtë festë.
Namazi i Bajramit sipas fesë islame është detyrim i domosdoshëm për çdo mysliman, ndërsa koha e namazit të Bajramit fillon me ngritjen e Diellit nga horizonti sa një shtizë, derisa të arrijë në zenit, kurse namazi i Bajramit ka dy rekate dhe dallon prej namazeve tjera për nga mënyra e faljes.