Pas më shumë se tre javësh në Serbi, trupi i të arratisurit Faton Hajrizi ka arritur në Kosovë e tanimë, po qëndron në Institutin e Mjekësisë Ligjore.
Për t’i dhënë dritë procesit të identifikimit, nëna dhe vëllai i të ndjerit kanë qëndruar në IML deri në fund të procesit.
E pas procedurave, ata shuan dilemat.
“Sot në mëngjes nëna e fatonit e ka identifiku kufomën e Fatonit, nuk ka më dilemë se është trupi i tij. Prej orës 13:00 bëhet autopsia”, ka deklaruar Koci.
Pas identifikimit, familja nuk ka pranuar të deklarohet për media.
E kritika për gjendjen e trupit të të ndjerit, shprehu vet avokati Koci.
Koci vlerësoi se kufoma nuk është mbajtur në kushte të duhura.
Për të vazhduar me procedurat, IML tani ka formuar edhe një komision enkas për rastin.
“Për shkak të ndjeshmërisë së rastit dhe rrethanave, në konsultim edhe me drejtorin e përgjithshëm kemi formuar një komision tre antarësh prej ekspertëve mjekoligjorë që do të kryejnë autopsinë që do të fillojë rreth orës 13:00 në prani të Prokurorit dhe familjarëve. Raporti i autopsisë varet, trupi i pajetë pas autopsisë do t’ju dorëzohet familjarëve”, ka deklaruar Drejtori i Departamentit të Laboratorëve Mjeko-Ligjor në IML, Agron Thaçi.
Trupi i Faton Hajrizit arriti në pikën kufitare të Merdares në orët e hershme të së premtes.
Ai u vra më 19 korrik në afërsi të kufirit mes Serbisë dhe Bosnjës, përkatësisht në Lloznicë, një ditë pasi dyshohej se vrau një polic serb dhe plagosi një tjetër.
I njëjti u arratis nga burgu i Smrekonicës më 6 korrik derisa po vuante dënimin për një sërë veprash penale.