Federata e Basketbollit të Kosovës ka paralajmëruar të hënën klubet për mosrespektim të ligjit në disa ndeshje.
Sipas njoftimit të FBK-së, gjatë disa takimeve është vërejtur konsumim i duhanit, përfshirë cigaret elektronike dhe “vape”, si dhe i pijeve alkoolike brenda palestrave sportive, gjë që është në kundërshtim me ligjet në fuqi.
Federata ka rikujtuar se në të gjitha hapësirat e mbyllura të palestrave ndalohet rreptësisht konsumimi i duhanit, futja, shitja dhe konsumimi i pijeve alkoolike.
“Rikujtojmë se, sipas ligjeve në fuqi, në të gjitha hapësirat e brendshme të palestrave sportive ndalohet rreptësisht konsumimi i duhanit, përfshirë cigaret elektronike apo ‘vape’; futja, konsumimi dhe shitja e pijeve alkoolike. Këto rregulla vlejnë për të gjitha ndeshjet dhe aktivitetet zyrtare të FBK-së dhe janë obligative për të gjitha klubet organizatore. Kërkojmë që këto rregulla të zbatohen në mënyrë rigoroze”, thuhet në njoftimin e Federatës së Basketbollit të Kosovës.