Federata e Basketbollit të Kosovës (FBK) po përballet me një krizë, për shkak të numrit të vogël të gjyqtarëve me përvojë, çka shihet se ka ndikuar drejtpërdrejt në cilësinë e garave dhe menaxhimin e ndeshjeve në Superligë.
Gjatë këtij sezoni, FBK-ja ka marrë masa disiplinore ndaj disa gjyqtarëve për gabime në ndeshjet e Superligës, përfshirë edhe ata me përvojë si Artan Gashi dhe Elldin Uglari. Këto dënime kanë përfshirë pezullime për disa ndeshje, duke e thelluar edhe më tej mungesën e gjyqtarëve të kualifikuar.
Së fundmi, është raportuar se edhe gjyqtari me përvojë Visar Bunjaku, i cili sapo është licencuar si Instruktor i Gjyqtarëve nga FIBA, është dënuar nga FBK-ja. Ky dënim ka ngushtuar më tej mundësitë për caktimin e gjyqtarëve në ndeshjet e ardhshme.
Për të adresuar këtë situatë emergjente, sipas burimeve të AsistiOnline.com, FBK-ja ka vendosur të heqë dënimet për gjyqtarët me përvojë dhe t’i delegojë ata për ndeshjet e xhiros së 25-të, duke reflektuar mungesën e alternativave cilësore.
Vendimi i fundit i Komisionit të Garave për dënim të gjytarëve ishte ai për duelin: Peja – Vëllaznimi, ku -Elldin Uglari, gjyqtar kryesor i ndeshjes ishte ndëshkuar me tri ndeshje mos delegim në tempon e kampionatit. Genc Vitaku, gjyqtar i parë i ndeshjes ishte ndëshkuar me tri ndeshje mos delegim në tempon
e kampionatit, si dhe Arian Kera, gjyqtar i dytë i ndeshjes ishte ndëshkuar me katër ndeshje mos delegim në tempon e kampionatit
AsistiOnline.com ka tentuar të kontaktojë me Komesarin e Garave, Faton Kurshumlija, për të marrë një sqarim lidhur me heqjen e dënimeve për gjyqtarët e tjerë dhe dënimin e fundit të Visar Bunjakut, por deri më tani nuk ka marrë ndonjë përgjigje.
Sipas burimeve të AsistiOnline.com, Bunjaku është dënuar lidhur me duelin e xhiros së fundit nga vikendi i kaluar, Trepça – Vëllaznimi.
Kjo situatë është një sinjal alarmi për FBK-në, e cila duhet të ndërmarrë hapa konkretë për rritjen e numrit dhe cilësisë së gjyqtarëve në vend, për të siguruar integritetin dhe cilësinë e garave në basketbollin kosovar.