Ish-deputeti i Partisë Demokratike të Kosovës (PDK), Ferat Shala, ka bërë të ditur se nuk do të jetë pjesë e listës së kandidatëve të kësaj partie në zgjedhjet e ardhshme që do të mbahen më 7 qershor.
Shala ka thënë se këtë vendim e ka marrë pas një “reflektimi të thellë mbi nevojat për ndryshim” brenda partisë, duke theksuar se kjo, sipas tij, i nevojitet PDK-së në këtë fazë.
Ai ka theksuar se tërheqja e tij nga kandidimi nuk nënkupton largim nga politika apo nga vetë partia.
Sipas tij, largimi nga lista i hap rrugë përfshirjes së kuadrove të rinj në parti.
Shala ka theksuar se kjo “frymëmarrje e re”, sipas tij, duhet të ruajë trashëgiminë e partisë, por edhe të sjellë qasje më të guximshme dhe vizionare për sfidat e ardhshme.