Arben Fetoshi, drejtor i Institutit Octopus ka thënë se nisma e fundit në Dhomën e Përfaqësuesve të Shteteve të Bashkuara të Amerikës(SHBA) për anëtarësimin e Kosova në NATO përbën një hap të qartë drejt sigurimit të paqes së qëndrueshme në Ballkanin Perëndimor.
Fetoshi theksoi se rezoluta e paraqitur nga kongresistët Keith Self, Ritchie Torres dhe Mike Lawler konfirmon qasjen strategjike të SHBA-ve për stabilitetin rajonal.
“Rezoluta … konfirmon qartësinë e Shteteve të Bashkuara të Amerikës për rrugën e paqes në Ballkanin Perëndimor”, ka shkruar Fetoshi në Facebook.
Sipas tij, në kushtet e kërcënimeve hibride nga Serbia dhe ndikimit potencial të Rusisë në rajon, anëtarësimi i Kosovës në NATO paraqet zgjidhjen më të sigurt dhe një mekanizëm për neutralizimin e burimeve të destabilizimit.
“Pra, Kosova në NATO nuk është vetëm aspiratë kombëtare, por edhe instrument parandalues, që eliminon kalkulimet destabilizuese të Serbisë dhe mbyll hapësirën e ndikimit rus në Ballkan”, ka thënë ai.
Fetoshi shtoi se kjo rezolutë vjen pas një sërë hapash të rëndësishëm, përfshirë National Defense Authorization Act (NDAA), Ligjin për Vlerësimin e Diskriminimit në Luginën e Preshevës (PVDAA) dhe vendimet që lidhen me përfshirjen e Forcës së Sigurisë së Kosovës në misione ndërkombëtare stabilizuese.
Në analizën e tij, ai përmendi edhe mungesën e njohjes së Kosovës nga disa vende anëtare të NATO-s, si Greqia, Rumania, Sllovakia dhe Spanja, duke argumentuar se kjo paqartësi krijon hapësirë për ndikim rus në kontinent.