Federata e Futbollit e Kosovës ka paraqitur ankesë në FIFA për veprimin e kombëtares së Serbisë, futbollistët e së cilës e kishin vendosur hartën e Kosovës në flamurin serb.
Para ndeshjes me kombëtaren e Brazilit, në zhveshtoren e kombëtares së Serbisë është vendosur një flamur, ku shihej harta e Kosovës me ngjyrat e flamurit serb, me mbishkrimin “Nuk ka dorëzim”.
FFK ka kërkuar nga FIFA që të marrë veprime sanksionuese ndaj veprimeve që nxisin gjuhën e urrejtjes mes popujve.
“Akte të tilla të shoviniste nuk kanë vend në një ngjarje sportive, e aq më pak brenda objekteve ku zhvillohet ngjarja më e madhe e futbollit botëror, prandaj FFK si anëtare e barabartë me të gjitha anëtaret e tjera të FIFA-s, kërkon nga ky institucion që të ndërmarrë masa sanksionuese ndaj veprimeve që nxisin urrejtje mes popujve dhe janë kundër vlerave njerëzore”, thuhet në njoftim.
Tutje, në komunikatën e FFK-së, thuhet se Kampionati Botëror duhet të jetë vend ku mbizotërojnë thirrjet për paqe dhe jo të ketë nxitje për urrejtje.
“Derisa Evropa e bota po ballafaqohen me një krizë të madhe si pasojë e agresionit të paprovokuar të Rusisë në Ukrainë, një kompeticion kaq madhështor siç është Kampionati botëror, duhet të jetë vend i mbizotërimit të thirrjeve për paqe, e jo të përdoret për të nxitur urrejtje mes popujve. Kosova është shtet i pavarur dhe demokratik, me respektim maksimal të të drejtave të njeriut dhe i pranuar nga shtetet më të fuqishme botërore dhe si e tillë do ta vazhdojë rrugëtimin e saj, pa marrë parasysh provokimet si ky i fundit”, thuhet në njoftim.
Ankesë në IOC dhe FIFA ka dërguar edhe Komiteti Olimpik i Kosovës.
“Është e turpshme se si udhëheqësit e Federatës së Futbollit të Serbisë lejuan të shfaqin mesazhe të tilla urrejtje ksenofobike dhe gjenocidale ndaj një shteti me të drejta të barabarta në Komitetin Olimpik Ndërkombëtar (IOC) dhe FIFA e UEFA”, thuhet në reagimin e tyre.