Trajneri i njohur Bylbyl Sokoli e ka komentuar hapjen e hetimeve ndaj kombëtares serbe nga FIFA.
I ftuar në emisionin “Dueli Botëror” në RTV Dukagjini ai tha se “ka qenë momenti i fundit që të reagohet në këtë formë. Sloganet dhe pankartat që i kanë përdorë, pos që janë raciste, ato nuk kontribuojnë në atë pjesë që FIFA e potencon drejtë zhvillimit të sportit”.
Sokoli po ashtu shtoi “shihet qartë se ka tensione në publik dhe në bankë, kurse tensioni në bankë u përcill në fushë e shkaku që ka pasur presion në fushë është kryekëput sjellja e trajnerit i cili ka qenë njeriu që ka shkaktuar tensione”.
Teksa, trajneri tjetër, Afrim Tovërlani tha se “nuk besoj që Serbia do të ketë dënim të rëndë. Do të ketë ndonjë tërheqje të vërejtjes. E rëndësishme është që Graniti ka dalë i pastër”.
Kjo është nata e 17- të e emisionit “Dueli Botëror” i cili do zgjasë deri në finalen e madhe të Kupës së Botës.
Edhe në netët në vazhdim do të ketë të ftuar të ndryshëm nga bota e sportit dhe jo vetëm, të cilët në fokus kryesor do ta kenë diskutimin për Kampionatin Botëror.