FIFA ka përgëzuar Federatën e Futbollit të Kosovës (FFK) për përgatitjen e statutit të ri.
Përmes një letre, FIFA ka bërë të ditur se së bashku me UEFA-n kanë punuar nga afër me FFK-në për përgatitjen e statutit.
“Në veçanti, do të doja ta shfrytëzoja këtë mundësi që t’ju përgëzoj për punën e bërë në përditësimin e Statutit të Federatës së Futbollit të Kosovës. Së bashku me kolegët tonë të UEFA-s, nga afër kemi përcjellë në vazhdimësi procesin, dhe kemi besim se Statuti i ri, i cili është prezantuar për aprovim në Kuvendin tuaj sot, është hap i drejtë dhe i duhur në drejtim të përmbushjes se objektives së përbashkët të qeverisjes dhe administrimit të mirë”, thuhet ndër të tjera në letrën e FIFA-s, bën të ditur FFK.
Edhe një herë tjetër, FIFA ka rikonfirmuar vazhdimin e bashkëpunim në mes të FIFA, UEFA dhe FFK, në të ardhmen.
Me 48 vota për, është votuar gjatë mëngjesit të sotëm draft statuti i ri i Federatës së Futbollit të Kosovës.
Mes shumë polemikash, në fund të Kuvendit të jashtëzakonshëm të thirrur nga shtëpia e futbollit të Kosovës, ka arritur të miratohet draft statuti i ri i FFK-së.
Kuvendi ishte i mbyllur për mediat.