Ka filluar takimi në mes të kryeministrit të Kosovës, Albin Kurti dhe këshillit grevist, i cili po përfaqësohet nga kryetari i Sindikatës së Arsimit, Rrahman Jasharaj.
Në këtë takim pritet të diskutohet në lidhje me kërkesat e punëtorëve të sektorit publik, të cilët kanë javë që janë në grevë.
Ky takim vjen pas disa javësh grevë nga punëtorët e sektorit publik të organizuar nga sindikatat e pavarura të Kosovës.
Sindikatat kanë kërkuar nga 100 euro shtesë deri në miratimin e plotë të Ligjit të Pagave, i cili pritet të miratohet në Kuvendin e Kosovës, pas disa javësh.
Para takimit me Kurtin, sindikatat kanë pasur takim me ministren e Arsimit, Arbërie Nagavci, por që rezultoi pa ndonjë marrëveshje të palëve.
Kryesindikalisti, Rrahman Jasharaj, vazhdimisht ka kërkuar takim me kryeministrin Albin Kurti, për të diskutuar në lidhje me çështjen e pagave.
Greva në administratë dhe në arsim është duke u mbajtur që nga data 25 gusht e këtij viti.
Ndryshe, ministri i Financave, Hekuran Murati, nuk i kishte procesuar me kohë pagat e muajit gusht për të gjithë punëtorët e sektorit publik, me arsyetimin se zyrtarët financiarë të komunave nëpër Kosovë, nuk i kanë dorëzuar listat e punëtorëve grevistë, dhe rrjedhimisht të gjithë punëtorëve qoftë edhe atyre që nuk janë në grevë nuk u kanë dalë pagat me kohë.
Qeveria e Kosovës ka insistuar që punëtorëve të cilët janë në grevë t’u pezullohet paga.