Qendra e Filmit e Serbisë ka bërë përzgjedhjen e kandidatit serb për çmimin Oscar 2023. “Mrak” (Errësira) i regjisorit Dushan Miliq është filmi që u përzgjodh për këtë çmim.
Komisoni që bëri këtë përzgjedhje përbëhej nga këta shtatë anëtarë, regjisori Ivan Ikiq (kryetari i komisionit), regjisori dhe producenti Stefan Ivanciq, skenaristi dhe regjisori Vuk Rsumoviq, aktorja Olivera Viktoroviq, kritiku i filmit Bozhidar Zeceviq, redaktori Dragan Petroviq dhe skenaristi Kosta Peshevski, shkruan një media serbe.
Sipas këtij komisioni, filmi “Mrak” (Errësira) përcjell disa ditë të jetës së një familjeje në Mitrovicën e Veriut.
Në ndërtimin e narracionit fillon të shpërfaqet natyra propagandistike e këtij filmi, i cili në të gjithë narracionin e tij vendos në pah propagandën serbe ndaj shqiptarëve të Kosovës dhe vetë Republikës së Kosovës. Sipas tyre, filmi prezanton një botë “frike” dhe “pasigurie” nëpërmjet elementeve të horrorit dhe një atmosferë të tensionuar.
Komisoni beson se filmi për shkak të “emocioneve të forta” dhe “universalitetit të temës”, do të komunikojë me audiencën ndërkombëtare dhe me anëtarët e Akademisë Amerikane të Shkencës, Arteve dhe Filmit.
Në këtë komisonin janë dorëzuar pesë filma, “E Premtja e Shenjtë – Kryqi në shkretëtirë” nga Haxhi-Aleksandr Gjuroviq, “Vera kur mësova të fluturoj” nga Radivoj Andriq, “Errësirë” nga Dushan Miliq, “Heronjtë e klasës punëtore” nga Millosh Pushiq dhe “Strahinja Banoviq” Stefan Arsenijeviq.
Para votimit, komisioni përcaktoi se filmi “Strahinja Banoviq” nuk i plotëson kërkesat e Akademisë Amerikane të Arteve dhe Shkencave të Filmit, sepse dialogu i filmit është kryesisht në gjuhën angleze (69.77 për qind).
Filmi “Errësira” u votua nga komisioni në mënyrë anonime me 11 pikë, ndërsa “Heronjtë e klasës punëtore” shtatë pikë, “Vera kur mësova të fluturoja” dy pikë dhe “E Premtja e Shenjtë – Kryqi në shkretëtirë” me vetëm një pikë.
Ky nuk është filmi i vetëm i realizuar nga regjisorët serbë dhe ata rusë me natyrë propagandistike, të cilët proklamojnë elemente nacionaliste kundrejt shqiptarëve të Kosovës. Edhe filmi i vitit 2019 “Balkan Line” i drejtuar nga regjisori rus, Andrey Volgin, ishte i tillë.