Duart nuk i shtrënguan mes vete e as në takim nuk e priti më 6 korrik në Prishtinë, por dy kryeministrat shqiptarë Albin Kurti dhe Edi Rama, ka mundësi të takohen në një shtet tjetër.
Forumi Strategjik i Bledit në Slloveni do të jetë nikoqir i liderëve të rajonit të hënën dhe të martën, ku pritet të përcillet zotimi për perspektivën e qartë evropiane të Ballkanit Perëndimor.
Njohësi i marrëdhënieve ndërkombëtare, Akri Cipa, thotë se Bledi është momentum i mirë për t’i sheshuar gjërat mes Kurtit e Ramës pasi që, sipas tij, dy çështjet që acaruan raportet e tyre, veriu i Kosovës dhe Ballkani i Hapur tashmë kanë marrë rrjedhë tjetër.
“Kanë aftësinë dhe maturinë e duhur për të gjetur një gjuhë të përbashkët, për të gjetur një mënyrë në raportet me proceset ndërkombëtare dhe bilaterale si dhe në raport me ato kërcënime që u kanosen jo vetëm shqiptarëve në Ballkan, por edhe rajonit tonë në sensin më të gjerë, duke marrë parasysh influencat që vijnë nga vendet e treta”, ka thënë njohësi i marrëdhënieve ndërkombëtare, Akri Çipa.
Me apo pa këtë takim, njohësi i çështjeve politike Gazmir Raci vlerëson se pjesëmarrja e Kosovës në këtë samit tregon se Kosova nuk është e izoluar ashtu siç mendojnë disa shtete.
“Kjo rikonfirmon rrugën e Kosovës drejt Bashkimit Evropian dhe që Kosova nuk është e bllokuar ashtu siç e menduan disa shtete dhe po ashtu rikonfimon që disa shtete anëtare të Bashkimit Evropian e shohin Kosovën si pjesë të pandashme të të gjitha shteteve të Ballkanit për tu bërë një dit anëtare e familjes Evropiane”, është shprehur analisti, Gazmir Raci.
Sipas Qeverisë, Kurti sonte do të marrë pjesë në darkën e punës të ftuar nga Kryeministri i Sllovenisë Robert Golob, ndërkaq të hënën do të jetë pjesë e një paneli të diskutimit së bashku me liderë të rajonit, si dhe do të zhvillojë disa takime bilaterale.
Në këtë forum, përveç shteteve anëtare të BE-së, marrin pjesë edhe Bosnja eHercegovina, Mali i Zi, Maqedonia e Veriut dhe Serbia.