Një foshnjë siriane që ka lindur nën rrënojat e shtëpisë së saj të shembur pas tërmetit që goditi vendin të hënën e javës së kaluar është zhvendosur në një  “lokacion të sigurt” nga autoritetet shëndetësore.

Drejtoria e Shëndetësisë ka marrë masa për të mbrojtur foshnjën e quajtur Aya, shkruan BBC.

Thuhej se ka pasur përpjekje për rrëmbimin e Ayas, por kreu i Drejtorisë së Shëndetësisë, Dr. Ahmad Hajj Hassan, ka mohuar pretendimet e tilla.

“Akuzat për rrëmbim ishin keqkuptim. Kjo ishte një çështje tërësisht e brendshme e lidhur me spitalin dhe jo me foshnjën”, ka thënë ai.

Ndryshe, tërmeti ka goditur edhe Sirinë sikurse Turqinë të hënën e 6 shkurtit, si pasojë e të cilit më shumë se 40 mijë njerëz kanë vdekur deri më tani.

Ndër të vdekurit raportohet se janë edhe babai dhe katër vëllezërit, motrat dhe halla e Aya-s.