Franca ka bërë të ditur se është duke u koordinuar me aleatët evropianë për mënyrën e reagimit në rast se Shtetet e Bashkuara do të ndërmarrin një pushtim të Grenlandë, në një klimë tensionesh të shtuara të nxitura nga kërcënimet gjithnjë e më të shpeshta të presidentit amerikan Donald Trump.
Ministri i Jashtëm i Francës, Jean-Noël Barrot, deklaroi se kjo çështje do të jetë pjesë e diskutimeve në një takim me ministrat e jashtëm të Gjermanisë dhe Polonisë, i planifikuar për të mërkurën.
“Ne duam të ndërmarrim veprime, por synojmë që këtë ta bëjmë së bashku me partnerët tanë evropianë”, theksoi ai.
Nga ana tjetër, Danimarkë ka paralajmëruar se një pushtim i Grenlandës nga SHBA-të do të nënkuptonte fundin e aleancës ushtarake perëndimore dhe të arkitekturës së sigurisë së ndërtuar pas Luftës së Dytë Botërore. Të martën, udhëheqësit evropianë ritheksuan se Grenlanda i përket popullit të saj.
Sipas Shtëpisë së Bardhë, Trump dhe ekipi i tij janë duke shqyrtuar një sërë opsionesh për blerjen e Grenlandës, përfshirë edhe mundësinë e përdorimit të ushtrisë amerikane.
Në mbrëmjen e së martës, parlamenti danez zhvilloi një seancë të jashtëzakonshme për të diskutuar situatën e cilësuar si e paprecedentë. Ndërkohë, ministri i Jashtëm danez, Lars Løkke Rasmussen, së bashku me homologen e tij nga Grenlanda, Vivian Motzfeldt, po kërkojnë një takim urgjent me Sekretarin amerikan të Shtetit, Marco Rubio.