Ligjvënësit francezë po përpiqen të arrijnë një marrëveshje për projektligjin që ndalon përdorimin e rrjeteve sociale nga fëmijët nën moshën 15 vjeç, me synimin që ai të hyjë në fuqi në fillim të vitit të ri shkollor në shtator.
Një komision i përbashkët i përbërë nga deputetë dhe senatorë është angazhuar për të harmonizuar versionet e ndryshme të projektligjit, ndërsa afati është i ngushtë për shkak të pushimeve verore të Parlamentit.
Nisma mbështetet fuqishëm nga presidenti Emmanuel Macron, i cili e konsideron atë një nga reformat kryesore për mbrojtjen e fëmijëve në hapësirën digjitale përpara përfundimit të mandatit të tij.
Mospajtimi kryesor mes dy dhomave të Parlamentit lidhet me shtrirjen e ndalimit. Asambleja Kombëtare kërkon që masa të zbatohet për të gjitha platformat e rrjeteve sociale, ndërsa Senati propozon një “listë të zezë” që do të përfshinte vetëm platforma të caktuara.
Projektligji parashikon përjashtimin e enciklopedive online, platformave arsimore e shkencore, si dhe faqeve për zhvillimin dhe shpërndarjen e softuerëve me burim të hapur. Ai përfshin gjithashtu ndalimin e përdorimit të telefonave celularë në shkollat e mesme.
Megjithatë, Komisioni Evropian ka kërkuar ndryshime në draft, duke vlerësuar se disa dispozita nuk janë plotësisht në përputhje me Aktin Evropian për Shërbimet Digjitale (DSA), edhe pse mbështet objektivin për mbrojtjen më të mirë të të miturve.
Nga ana tjetër, Senati francez argumenton se Brukseli nuk ka kundërshtuar idenë e “listës së zezë”, por vetëm kompetencat që projektligji i jep autoritetit rregullator francez për komunikimin audiovizual dhe dixhital.
Nëse arrihet kompromisi, projektligji pritet t’i nënshtrohet votimit përfundimtar në të dyja dhomat e Parlamentit gjatë kësaj jave. Megjithatë, ligji nuk mund të hyjë në fuqi para 10 gushtit, për shkak të procedurave të njoftimit të kërkuara nga legjislacioni i Bashkimit Evropian.