Galatasaray e ka fituar Kupën e Turqisë të mërkurën mbrëma për herë të 19-të në histori, pasi mposhti Trabzonsporin me rezultat të pastër 3:0 në finalen e zhvilluar në Gaziantep.
Baris Alper Yilmaz hapi serinë e golave në minutën e 5-të, ndërsa dy golat e tjerë u shënuan nga sulmuesi nigerian, Victor Osimhen – një në fillim të pjesës së dytë dhe tjetrin në minutën e 63-të.
Osimhen jo vetëm që e vulosi fitoren, por theu edhe rekordin si futbollisti i huaj me më së shumti gola në një sezon me Galatasarayn – 35 gola, një më shumë se Mario Jardel që kishte realizuar 34 në sezonin 2000-01.