Ish-deputeti i Lidhjes Demokratike të Kosovës, Arben Gashi, ka rikujtuar momentet e rënda pas sulmit terrorist të 24 shtatorit 2023 në Banjskë, ku u vra zyrtari policor Afrim Bunjaku.
Në Debat Plus, Gashi riktheu vëmendjen tek seanca e jashtëzakonshme e 28 shtatorit 2023.
Atëbotë, deputetët e Kuvendit të Kosovës nisën atë seancë me një minutë heshtje në nder të policit Bunjaku, ndërsa pas konsultimeve me grupet parlamentare u vendos që seanca të mos fillonte me deklarime politike, por me hartimin dhe miratimin e një projektrezolute që dënonte sulmin terrorist në veri.
Kjo rezolutë ishte përkrahur nga të gjitha grupet parlamentare.
Duke kujtuar atmosferën e asaj dite, Gashi ka thënë se kryeministri Albin Kurti kishte hyrë në Kuvend dukshëm i tronditur, ndryshe nga sjelljet e tij të zakonshme.
“Kur është vrarë polici Afrim Bunjaku (në sulmin terrorist të 24 shtatorit në Banjskë)…aq i frikësuar ka qenë zoti KURTI, sa kur ka hyrë në Kuvend, nga ai luani, shqiponja që i hapte krahët. Vinte me na’u lutë, se nuk e dinte se qysh reagon. Qysh do të reagojë salla. Ia kemi dhënë përkrahjen e plotë, pa asnjë rezervë. Jo Albin Kurtit, jo VV-së, por kryeministrit të Kosovës, shtetit dhe çdo polic që ka shkuar në veri”, ka thënë Gashi.