Analisti, Dardan Gashi, në “Debat Plus” në RTV Dukagjini, ka thënë se Qeveria Kurti e ka pranuar një draft të keq për Kosovën.
“Të gjitha indikacionet janë që e ka pranuar një draft jashtëzakonisht të keq për Kosovën”, ka thënë Gashi.
Gashi ka thënë se do të zgjohemi në një Republikë që kryeministri i Kosovës, Albin Kurti, “e ka pasë ëndërr”.
“Kemi me u zgju në një Republikë të re që Albin Kurti e ka pasë ëndërr, Republikën e tretë. E ka pasë pjesë të imagjinatës së tij, dhe kjo Republika e tretë e Albin Kurtit do të duket kështu e ‘sakatume’ ”, ka thënë ai.
Sipas tij, dy javë pas Basnjkës, kur Kosova ishte dashur të jetë në elementin më të mirë të mundshëm diplomatik, “ka dështuar totalisht”.
“Dy javë pas Basnjkës kur Kosova ishte dashur të jetë në elementin më të mirë të mundshëm diplomatik, dështon totalisht dhe pranohet diçka që nuk e dimë mirë se çfarë ka pranuar”, është shprehur ai.
Kujtojmë që sot i dërguari i posaçëm i Bashkimit Evropian për dialogun Kosovë-Serbi, Miroslav Lajçak, është takuar me krerët e opozitës, i cili pas takimeve është shprehur se ka pasur një ditë shumë produktive.
Had a very productive day in Kosovo today with good exchanges on latest developments in the EU-facilitated Dialogue and the way ahead. Grateful to all my interlocutors for their active role and support. pic.twitter.com/Jc0KWPmbTW
— Miroslav Lajčák (@MiroslavLajcak) November 7, 2023
Nga Lidhja Demokratike e Kosovës, Lajçak është takuar me nënkryetarin e kësaj partie, Lufi Haziri.
Haziri ka thënë se Lajçak e ka konfirmuar se kryeministri Kurti i ka thënë “PO” planit të sekuencimit, zbatimit të marrëveshjes dhe propozimit evropian, ku përfshihet draft-statuti për Asociacionin.
Lexo dhe: Haziri: Lajçak e konfirmoi se Kurti e ka pranuar planin evropian bashkë me draftin e Asociacionit
“Nuk kemi folur specifikisht për atë, sepse është detyrë e kryeministrit, ka rregulla dialogu. Nuk ka negociata, s’po shohim, palët po ofrojnë komente, ato nuk po negociohen. Është cështje që po e ruajnë procesin për veten e tyre, natyrisht një PO e konfirmuar nga Kosova u tha edhe nga Lajcak, që Kosova e ka pranuar planin e sekuencimit, zbatimin e marrëveshjes dhe modelin evropian”, ka thënë Haziri.
Nga Partia Demokratike e Kosovës, Lajçak është takuar me kreun e partisë, Memli Krasniqi. Ky i fundit ka thënë se Lajçak nuk ua ka prezantuar tekstin e draft-statutit, edhe pse kjo sipas tij ka qenë kërkesë e vazhdueshme e PDK-së.
Lexo dhe: Krasniqi: Lajçak tha se drafti i Asociacionit është në përputhje me Kushtetutën
“Ishte takim informues në lidhur me rrjedhjen e procesit të dialogut, ai na informoi për hapat që janë ndërmarrë nga ana e tyre dhe po ashtu shprehu qëndrimin e BE-së që drafti i Asociacionit që i është propozuar Qeverisë është një draft që është në pajtim me Kushtetutën e Kosovës dhe që nuk shkon përtej vijave të kuqe. Por, fatkeqësisht, ne nuk patëm mundësinë që ta diskutojmë atë tekstin integral”, ka deklaruar ai.
Ndërsa, nga Aleanca për Ardhmërinë e Kosovës, Lajçak është takuar me kryetarin e partisë, Ramush Haradinaj.