Deputeti i Lidhjes Demokratike të Kosovës (LDK), Arben Gashi, ka reaguar për situatën në Kuvendin e Kosovës, duke shprehur shqetësim për rritjen e tensioneve dhe mundësinë e përplasjeve fizike.
Përmes një postimi në Facebook, Gashi ka thënë se në këtë situatë kritike po mungon një qëndrim i qartë dhe i fortë i LDK-së.
“Situata në Kuvend po shkon drejt përplasjeve fizike, ndërsa insistimi për bllokimin e tij vazhdon”, ka shkruar Gashi.
Sipas tij, në këtë moment Kosovës i duhet më shumë dialog, maturi dhe forcim i institucioneve.
“Në këtë moment kritik, po mungon një pozicionim i qartë dhe i fortë i LDK-së. Në fakt, Kosovës po i mungon LDK-ja. Po i mungon fryma Rugoviane”, ka deklaruar ai.
Gashi ka theksuar se në kohë të tensioneve politike, vendit i duhet një qasje që, sipas tij, përfaqëson dialogun dhe shtetësinë.
“Sepse kur institucionet bllokohen dhe tensionet rriten, Kosovës i duhet më shumë dialog, maturi, shtet dhe Republikë”, ka shkruar ai.
Në fund, Gashi i ka bërë thirrje LDK-së që të reagojë dhe të marrë qëndrim.
“Është koha që LDK-ja të flasë”, ka përfunduar ai.