Gjykata Kushtetuese tre muaj më parë ka shpallur jokushtetuese dispozitat e Ligjit për Skema Pensionale të Financuara nga Shteti dhe Udhëzimin Administrativ të Qeverisë të cilët kanë kufizuar të drejtën e qytetarëve për të përfituar pensionet me dëshmi për 15 vjet pune.
Kushtetuesja kishte përcaktuar shfuqizimin e dispozitave të vlerësuara në kundërshtim me Kushtetutën pas një periudhe gjashtë mujore, përkatësisht më 15 korrik 2023. Por, të vogla janë gjasat që kjo të ndodhë.
“Janë shumë të vogla gjasat që të jetësohet vendimi i Gjykatës Kushtetuese, i marrë para më shumë se tre muaj për shfuqizimin e dispozitave diskriminuese, të cilat kanë kufizuar të drejtën e qytetarëve për të përfituar pensionet e financuara nga shteti, pa dëshmi për 15 vjet pune”.
Kështu tha për Radio Dukagjinin, kryetari i Shoqatës së pensionistëve të Kosovës, Njazi Gashi.
“Gjasat janë shumë të vogla për arsye se qeveria nuk e ka prezentuar fare këtë vendim të Gjykatës Kushtetuese në Kuvend, gjë që e ka pas obligim kushtetues ta bëjë , dhe natuyrisht kjo çështje do të prolongohet dhe do të ketë reperkusione juridike,për shkak të mosrealizimit të vendimit të Gjykatës Kushtetuese”, tha Gashi.
Ai shtoi se një javë më parë, me proceduarë zyrtare kanë kërkuar të jetësohet vendimi, por ende nuk kanë marr përgjigje.
“Me procedurë zyrtare ,ne kemi kërkuar që ata të çojnë në vend vendimin e Gjykatës Kushtetuese,por ende nuk e kanë bërë këtë dhe jemi në pritje të vendimeve që do t’i merr qeveria”, shtoi Gashi.
Përveç kërkesës për procedim të vendimit të kushtetueses ,ai thotë se do të vazhdojnë të kerojnë jetësimin e të drejtës së tyre, duke mos përjashtuar se në fund mund të vijnë në shprehje edhe protestat.