Lyudmila Makey është gazetarja e parë nga Ukraina e cila është strehuar në Kosovë.
Makey komentoi gjendjen në Ukrainë dhe luftën që po ndodh atje. Ajo, gjithashtu, ka folur edhe për qëndrimin e Ukrainës karshi Kosovës.
Ajo në emisionin Personale në RTV Dukagjini ka thënë se “Sot situata gjeopolitike ka ndryshuar. Ndoshta, për gjithë këtë mbështetje nga Kosova, për strehimin e gazetarëve dhe pozicionin e saj ndaj Rusisë, mund të bëhet një hap tutje dhe Ukraina të njohë shtetin e Kosovës“.
Gazetarja ukrainase, gjithashtu, potencoi faktin se në fillim të viteve 2000, Ukraina ishte nën presionin rus.
“Me kalimin e viteve, edhe pse krerët dhe qeveritë kanë ndryshuar në Ukrainë, qëndrimi i tyre ndaj Kosovës nuk ka ndryshuar për shkak të burokracive,” shtoi Makey.
Mekay është shumë falënderuese për mundësinë që i ka ofruar Kosova, për të qëndruar këtu.
“Falënderoj shumë të gjithë juve që më keni mundësuar të vij në Kosovë. Ky program më mundëson që të mbetem në profesionin e gazetares. Jam thellësisht e prekur me faktin se si njerëz tërësisht të huaj dëshirojnë të na ndihmojnë. Besoj që bashkëpunimi ynë dhe solidariteti nga gazetarët e tjerë është një hap i rëndësishëm drejt paqes”, tha ajo.
Sipas Asociacionit të Gazetarëve të Kosovës, në programin e mbështetur financiarisht nga Qeveria e Kosovës, gazetarët që janë të detyruar të ikin nga lufta në Ukrainë, në Kosovë do të përfitojnë pagë mujore, pagesën e qirasë dhe sigurimin shëndetësor, përcjell Portali D.