Ish-ushtaraku, Hysen Gecaj, ka thënë se kemi pasur raste edhe më herët të tentativave të Serbisë për të destabilizuar Kosovën sidomos në pjesën veriore dhe kjo e fundit është në vazhdën e atyre tentativa.
Sipas Gecajt, presidenti Aleksandër Vuçiq, është i vetëdijshëm se e gjithë bota e di, që shakatari i të gjitha problemeve në Kosovë dhe në të gjithë Ballkanin është Serbia.
“Nuk ka çka të humbasë më shumë mirëpo ai po i shfrytëzon këto momente, këto situata që në një moment të caktuar kur të ulen për bisedime të përfitojë sa më shumë që është e mundur”, ka thënë Gecaj.
“Herë pas here këto tentative janë më të ashpra më të theksuara dhe sigurisht që kjo nisma për anëtarësim të Kosovës në Këshillin e Evropës e ka frustruar edhe më tepër Vuqiqin, ai për herë të parë e humbi kontrollin për kundër faktit që mundohet të paraqesë vetën dhe Serbinë si viktimë karshi bashkësisë ndërkombëtare”, ka shtuar Gecaj.
I ftuar në emisionin “Five”, Gecaj ka folur edhe për aspektin e sigurisë, sipas tij ky është një moment frustrimi i aparatit shtetëror serb, pasojat i ndjejnë edhe tek qytetarët e Kosovës edhe tek ata serb por edhe tek shqiptarët, teksa përmendi edhe rastin e ditës së djeshme ku shumë shtetas kosovarë u mbajtën në kufijtë e Serbisë nën një trysni të jashtëzakonshme nga autoritetet serbe.
“Serbia me këtë sjellje tenton të tregohet si një faktor, dërgon mesazh që unë jam faktor stabiliteti, i dërgon mesazh bashkësisë ndërkombëtare sepse dihet që trysnia ka filluar të rritet karshi Kosovës dhe Serbisë për implementimin e marrëveshjeve të mëhershme”, ka shtuar ai.