“Mirësevjen Gentrit Dumani”.

Kështu i ka uruar mirëseardhjen FC Prishtina mbrojtësit që së fundmi i është bashkuar ekipit kryeqytetas, Gentrit Dumani.

Përmes një postimi zyrtar në Facebook, bëhet e ditur se mbrojtësi 28 vjeçar do të jetë pjesë e FC Prishtinës.

Klubi kryeqytetas vazhdon me përforcimet e kësaj vere duke shënuar prurjen e shtatë deri tani, atë të ish-mbrojtësit të Malishevës.

Transferimin e Dumanit e ka konfirmuar vet faqja zyrtare e klubit, me të cilën mbrojtësi ka dhënë edhe një intervistë në lidhje me ambiciet.

Dumani ka shënuar një rikthim në Prishtinë ngase ai ka qenë pjesë e FC Prishtinës në vitet 2015-18 me ç’rast i ka fituar edhe dy Kupa të Kosovës dhe një trofe të Superkupës.

Krahas FC Prishtinës dhe Malishevës, pjesë e përvojës së tij në fushë është edhe koha në Flamurtar, Drenicë dhe Fushë Kosovë.