Ministrja e Punëve të Jashtme dhe Diasporës, Donika Gërvalla, ka reaguar në lidhje me raportimet e mediave serbe se shteti i Kongos e ka tërhequr njohjen për Kosovën.
Gërvalla, tha se çnjohja ka ndodhur në vitin 2019, pa qenë në pushtet Lëvizja Vetëvendosje dhe Lista Guxo.
Tutje ajo është treguar e ashpër në reagimin e saj duke akuzuar se disa ndjejnë kënaqësi me lajme negative për Kosovën.
“Të gjithë të ekzaltuarve rreth “çnjohjes” së Togos dhe propagandës së Daçiçit dua t’iu rikujtoj që ajo ka ndodhur në vitin 2019, pra shumë kohë para se vinte në detyrë kjo qeveri”, ka thënë ajo.
“Të dhëmbin sytë kur sheh se sa shumë përjargen disa, sa herë që Sllobo i Vogël përpiqet t’i japë një shqelm Kosovës”, ka vijuar ajo.
Ministrja Gërvalla, është shprehur se Kosova do të jetë fituese duke e përmendur edhe luftën e vitit 1999.
“Kosova do ta fitojë betejën e saj sot, ashtu siç e ka fituar në 1999. Me mençuri, trimëri, guxim, sakrificë e përplot miq e aleatë anembanë botës së lirë dhe demokratike. Dhe Serbia përsëri do të humbasë, siç ka humbur 1999, sepse e vërteta gjithmonë fiton mbi gënjeshtrën”, ka deklaruar ajo.
Ajo ka theksuar se shteti i Serbisë, në krye me Aleksandër Vuçiqin dhe Ivica Daçiqin, “mund ta fitojnë ndonjë sprint, por Kosova dhe qytetarët e saj përfundimisht do ta fitojnë maratonën, siç e kanë fituar në vitet e 90-ta”.
Në mos për asgjë tjetër, sipas saj “atëherë për hir të sakrificës së dhimbshme dhe kolosale në rrugën tonë drejt lirisë”.