Ministrja e Punëve të Jashtme e Kosovës, Donika Gërvalla, për mundësinë që të hynte në koalicion me ndonjë nga partitë opozitare, ka thënë se kjo do të ndodhte vetëm nëse njëra nga partitë do të “çlirohej nga njerëzit që përfaqësojnë krimin dhe korrupsionin”.
“Të flasim për realitetin. Në rastin ekstrem, që nuk pres të ndodhë në mandatin e ardhshëm, nëse PDK-ja apo cila parti tjetër në Kosovë, do të ishte çliruar apo ndarë nga radhët e saj nga njerëz që edhe sot janë aty dhe që e përfaqësojnë krimin dhe korrupsionin që e kanë zhvatur shtetin e Kosovës dhe që janë pasuruar pafundësisht në kurriz të qytetarëve, atëherë nuk do të shihja asnjë pengesë. Por nuk e shoh këtë mundësi”, ka thënë Gërvalla për TV Syri.
Ajo ka thënë se ka qenë kritike ndaj aleancës PDK – LDK, sepse e kishte ditur që “kjo ka për ta zhbërë LDK-në si parti e rëndësishme në skenën politike”.
“Edhe pse PDK-ja, të them të drejtën, jo vetëm në Kosovë, por edhe për aleatët tanë ndërkombëtarë ka qenë partia e cila ka qenë sinonim i korrupsionit dhe krimit të organizuar. E di që sot nuk ju vjen mirë kur flasim për korrupsionin, por ne nuk i kemi marrë 50 për qind të votave sepse këtu ju ka ardhë korrupsioni qytetarëve”, ka thënë ajo.