Ministrja e Punëve të Jashtme, Donika Gëravlla Schwarz ka thënë në një intervistë për emisionin “Five” të Dukagjinit se beson në pafajësinë e ambasadorit Berishaj. Andaj, ka thënë se aktualisht nuk ka indikacione se Berishaj mund të shkarkohet.
Pushteti aktualisht nuk planifikon ta shkarkojë ambasadorin Martin Berishaj, i cili pretendohet se është i përfshirë në një skandal financiar mbi gjysmë milioni euro në Slloveni.
Ministrja e Punëve të Jashtme, Donika Gërvalla thotë se për momentin nuk ka asnjë arsye të besojë që këto pretendimet mund të dalin të sakta.
Gërvalla në një lidhje të drejtpërdrejtë nga SHBA-ja në emisionin “Five” të Dukagjinit tha se po ndjek me kujdes këto zhvillime.
“Është çështje e organeve të drejtësisë të cilave u është drejtuar Z. Berishaj që të bëjnë një konstatim të tillë dhe jo e jona apo e interpretimeve të ndryshme. Do të ndjekim me shumë kujdes të gjitha zhvillimet dhe do të ndërmarrim hapat atëherë kur ato do të jenë të nevojshme, nëse do të jenë të nevojshme, gjë për të cilën deri në këtë moment nuk kemi asnjë indikacion”, ka thënë Gërvalla.
Në anën tjetër, Presidenca ka njoftuar se nga ambasadori Berishaj ka kërkuar raport me shkrim lidhur me këto pretendime.
Berishaj është thirrur nga presidentja Vjosa Osmani që të vijë fizikisht në Kosovë për të sqaruar rastin.
Gjatë intervistës në “Five”, ministrja Gërvalla foli edhe për deklaratat e homologut të saj serb kundër ish-krerëve të UÇK-së.
“Unë shpatën nuk mund ta nxjerrë në seancën e Këshillit të Sigurimit të OKB-së dhe të fillojë dyluftimin. Nuk habitem aspak nga reagimi i ministrit të jashtëm Selakoviq sepse nuk është hera e parë që ballafaqohemi në forume të ndryshme”.
Gërvalla – Schwarz njoftoi se në kuadër të vizitës së saj në SHBA do të zhvillojë disa takime tjera.