Ministrja e Punëve të Jashtme, Donika Gërvalla, ka reaguar pas ngritjes së aktakuzës ndaj saj për mosdeklarim të pasurisë.
Ajo ka thënë se aktakuza është ngritur para katër muajsh dhe se çështja në fjalë është sqaruar para dy vjetësh. Publikimin e aktakuzës, ajo e ka cilësuar si fushatë politike dhe jo vënie të drejtësisë.
“Në fakt, kjo çështje është sqaruar përfundimisht që para dy vjetësh, pra në vitin 2021. Tani është aktualizuar nga prokurorë të caktuar, gjatë përpjekjeve të përsëritura për të hedhur baltë dhe inkriminuar përfaqësuesit e institucioneve të Republikës dhe për t’i shërbyer kështu fushatave politike e jo vënies së drejtësisë”, ka thënë ai.
“Shpresoj që gjykata, e cila duhet të merret me këtë rast, të gjykojë bazuar mbi faktet objektive e jo interesat e prekura individuale të atyre, të cilët dëshirojnë me shantazhe dhe kërcënime të vijnë në krye të institucioneve të drejtësisë”, ka vijuar ai.
Tutje ajo i ka përmendur edhe partitë opozitare se po tentojnë ta pengojnë drejtësinë.
“Që në fillim të marrjes së detyrës nuk kam pasur iluzione. Të gjithë e kemi ditur që ata, të cilët humbën jo vetëm zgjedhjet, por edhe mundësinë për të zhvatur edhe më tej shtetin dhe paranë publike, nuk do të zgjedhin mjete në betejën e tyre për të ndalur sundimin e ligjit dhe luftën kundër korrupsionit dhe krimit të organizuar. Madje në çdo ditë të punës sime kam qenë e ndërgjegjshme që duhet të jemi të përgatitur për rreziqe edhe shumë më të mëdha sesa fushatat denigruese”, ka thënë ajo.
Ndryshe, Prokuroria Themelore në Prishtinë ka ngritur aktakuzë ndaj ministres së Punëve të Jashtme, Donika Gërvalla.
Arsyeja po del të jetë “penale ‘Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”.