Ministrja e Punëve të Jashtme, Donika Gërvalla, ka njoftuar për një bisedë “të përzemërt”, telefonike të cilët e zhvilloi bashkë me kryediplomatin e shtetit arabik të Jordanisë për çështje rajonale dhe evropiane, Ayman Safadi.
Ajo përmes një postimi në Twitter, ka thënë se gjatë kësaj bisede është dakorduar për zgjerimin e mëtutjeshëm të marrëdhënieve midis dy vendeve.
“Sot pata bisedë tejet të përzemërt me zëvendëskryeministrin dhe ministrin e jashtëm Ayman Safadi. Së bashku diskutuam zhvillimet aktuale në rajon dhe Evropë dhe u pajtuam të fuqizojmë më tej dhe të zgjerojmë bashkëpunimin mes Jordanisë dhe Kosovës”, ka shkruar Gërvalla.
Today, I had a very cordial exchange with the🇯🇴Deputy Prime Minister and Minister of Foreign Affairs and Expatriates @AymanHsafadi. We discussed the current developments in the region & #Europe and agreed to further strengthen & enhance the cooperation between🇯🇴 and 🇽🇰. pic.twitter.com/NuJe9LGsSS
— Donika Gërvalla-Schwarz (@gervallaschwarz) May 1, 2022
Ndryshe, kryeministri i Kosovës, Albin Kurti, më 18 shkurt të vitit 2022, kishte zhvilluar një takim bileteral me zëvendëskryeministrin, njëherësh ministrin e punëve të Jashtme të Mbretërisë së Jordanisë, Ayman Safadi.
Gjatë takimit, kryeministri Kurti kishte folur për mundësitë që marrëdhëniet e mira politike dhe diplomatike të dy vendeve të thellohen edhe më tej nëpërmjet bashkëpunimin ekonomik dhe tregtar.
Kryeministri Kurti kishte veçuar potencialin e Kosovës në fushën e Teknologjisë së Informacionit dhe Komunikimit.
Po ashtu, ishte diskutuar mbi qëllimet e përbashkëta në fushën e sigurisë dhe për sfidat në ballafaqimin me pandeminë.
Ndërsa, zëvendëskryeministri jordanez, Safadi kishte thënë se si një nga shtetet e para që e ka njohur Republikën e Kosovës, Mbretëria e Jordanit vazhdon të jetë përkrahëse e vendosur e saj.
Në fund të takimit, kryeministri Kurti kishte marrë ftesë për vizitë në Jordani, teksa të dy ishin zotuar në emër të qeverive respektive që të thellojnë më tej marrëdhëniet bilaterale.