Një kontroll i ri në shtëpinë e presidentit Joe Biden në Wilmington, Delaware, nga Departamenti Amerikan i Drejtësisë, të premten, gjeti gjashtë sende të tjera, duke përfshirë dokumente me shenja klasifikimi, tha një avokat i presidentit në një deklaratë të shtunën mbrëma.
Disa nga dokumentet e klasifikuara dhe “materialet rrethuese” datojnë nga mandati i Biden në Senatin e SHBA, ku ai përfaqësoi Delaware nga viti 1973 deri në 2009, sipas avokatit të tij, Bob Bauer.
Dokumentet e tjera ishin nga qëndrimi i tij si zëvendëspresident në administratën Obama, nga viti 2009 deri në vitin 2017, tha Bauer, shkruan Reuters.
Departamenti i Drejtësisë, i cili kreu një kontroll që zgjati mbi 12 orë, mori gjithashtu disa shënime që Biden i kishte shkruar personalisht si zëvendëspresident, sipas avokatit.
Presidenti ofroi qasje “në shtëpinë e tij për të lejuar DD të kryejë një kontroll në të gjithë ambientet për të dhënat e mundshme të zëvendëspresidentëve dhe materialet e mundshme të klasifikuara,” tha Bauer.
As Biden dhe as gruaja e tij nuk ishin të pranishëm gjatë kontrollit, tha avokati. Biden është në Rehoboth Beach, Delaware, për fundjavën.
Hetuesit e Departamentit të Drejtësisë e koordinuan kërkimin me avokatët e Biden para kohe, tha Bauer, dhe avokatët personalë të presidentit dhe të Shtëpisë së Bardhë ishin të pranishëm në atë kohë.
Të dhëna të tjera të klasifikuara të Qeverisë u zbuluan këtë muaj në rezidencën e Biden-it në Wilmington, dhe në nëntor në një zyrë private që ai mbante në një institut kërkimi në Uashington, DC, pasi përfundoi mandatin e tij si zëvendëspresident në administratën Obama në 2017.