Gjatë javës së kaluar, në lokacione të ndryshme e aksione të ndara në Prishtinë, janë realizuar 119 urdhëresa të gjykatës, prej tyre 18 urdhëresa për vepra penale, ndërsa të tjerat për kundërvajtje, seanca, verifikime e të tjerë.
“Konform urdhëresave, pas përfundimit të procedurave policore, personat e dënuar me burgim janë dërguar për vuajtje të dënimit, ndërsa personat e dënuar me gjobë, janë liruar, pasi të njëjtit kanë kryer obligimet e caktuara në urdhëresa”, ka njoftuar Policia e Kosovës.
Policia ka bërë të ditur se aktivitete policore janë shtrirë edhe në segmente të tjera të sigurisë, derisa gjatë periudhës së njëjtë, janë sekuestruar 8 armë të ftohta (thika) dhe 1 armë zjarri.
Më tej njoftohet se në po të njëjtën periudhë kohore, kanë shqiptuar një mijë e 946 masave administrative me gjobë për lloje të ndryshme të kundërvajtjeve dhe të shkeljeve të kodit rrugor.