Zëdhënësi i Kremlinit, Dmitry Peskov, të martën e 22 nëntorit ka njoftuar se gjatë kësaj jave presidenti rus, Vladimir Putin, do të takohet me nënat e ushtarëve rezervistë të thirrur për të luftuar në Ukrainë.
“Në të vërtetë, një takim i tillë është planifikuar, ne mund ta konfirmojmë. Presidenti mban shpesh takime të tilla, ato nuk janë të gjitha publike. Në çdo rast, presidenti merr informacion të drejtpërdrejtë për gjendjen reale të punëve”, ka thënë Peskov, por nuk e ka specifikuar datën e saktë se kur Putini do të takohet me nënat e ushtarëve rezervistë.
Më shtatë nëntor presidenti Putin ka dhënë një përditësim për urdhrin e tij të shtuar të rekrutimit ushtarak, duke thënë se 50 mijë nga ushtarët e rekrutuar së fundmi tani janë në Ukrainë.
Gjatë kësaj kohe ushtarët rusë dhe familjet e tyre kanë raportuar vështirësi logjistike si, uniforma të pamjaftueshme, ushqim të dobët dhe mungesë të furnizimeve mjekësore, raporton CNN.
Projekti i gazetarëve të pavarur rusë Astra Telegram ka njoftuar se rreth 300 rusë të mobilizuar janë duke u mbajtur në një bodrum në Zaitsevo në rajonin e Luhanskut për refuzimin e kthimit në vijën e parë.