Dy vajzat e zhdukura një javë më parë në Pejë janë gjetur gjallë.

Lajmin e ka bërë të ditur ish-deputeti, Veton Berisha, përmes një postimi në Facebook.

“Vajzat e zhdukura një javë më parë E.B dhe L.N janë gjetur gjallë dhe janë paraqitur në stacionin policor në Pejë, ku jemi prezentë bashkë me to”, ka shkruar Berisha, gjersa i ka falënderuar të gjithë ata që kishin ndihmuar përgjatë procesit.

Të dy vajzat nga Peja ishin raportuar të zhdukura një javë më parë, njëra nga fshati Treboviq dhe tjetra nga Qyshku i Pejës.

Në raportin 24-orësh të Policisë së Kosovës më 25 shtator thuhej se, vajzat ishin larguar nga shtëpitë dhe nuk ishin kthyer më.

“Fsh. Treboviq dhe Fsh. Qyshk, Pejë (NN) 23.09.2022 – 07:00. Dy ankues meshkuj kosovarë kanë informuar se vajzat e tyre kosovare janë larguar nga shtëpitë dhe nuk janë kthyer më”, thuhet në raport.

Atë kohë, u bë e ditur se rastet janë duke u hetuar.