Gjurmët që do të çojnë deri e vërteta që u fsheh për 27 vite po vazhdojnë të gërmohen.
Edhe të shtunën, ekipet e Institutit të Mjekësisë Ligjore, bashkë me hetuesit policorë vazhduan punimet në Kalludër te Vogël të Zubin Potokut.
Veçse ndryshe nga ditët tjera, ekipet në këtë varrezë të dyshuar masive, sot pritën në vizitë goxha mysafirë.
Kryeministri në detyrë, Albin Kurti bashkë me përfaqësues nga Instituti për Krimet e kryera gjatë Luftës, Policia e Kosovës, dhe Komisioni Qeveritar për të Zhdukurit, panë nga afër punën që po zhvillohet thellë mes maleve të veriut.
Kurti bashkë me të tjerët shkuan afër përrockës ku u gjetën mbetjet mortore.
E lartë, zyrtarët policorë po kujdeseshin maksimalisht për sigurinë.
Kur vizita përfundoi, Kurti konfirmoi se gjatë qëndrimit të tij atje u gjetën mbetje të reja mortore.
‘Sa ishim ne aty u zbuluan edhe disa kocka të reja meqenëse gërmime edhe eksumimi po vazhdon. Unë falenderojë IML me ekspertët e forenzikës edhe me antropologët’, ka thënë Kurti.
Tutje, ai konfirmoi atë që pritej, se gërmimet do të marrin goxha kohë.
“Tash do të vazhdojnë këto gërmime edhe shumë javë ndoshta me muaj meqenëse eshtrat e gjeta janë të shpërndara dhe janë buzë një përroi e cili me shumë gjasë në stinën e pranverës është një përrua i fuqishëm. Në këtë mënyrë trupat edhe nëse janë varrosur në të njejtin vend mund të mos jenë aty”, ka shtuar Kurti.
Shefi i ekzekutivit deklaroi se çuditërisht Serbia po arreston serbë, të cilët para më shumë se dy dekadash u kanë treguar ndërkombëtarëve për krimet e kryera në Kosovë.
‘Edhe njëherë i bëjmë thirrje faktorëve ndërkombëtarë, Shteteve të Bashkuara të Amerikës dhe BE-së që këto dokumente që janë të klasifikuara në Beograd të deklasifikohen dhe të zbardhet e vërteta”, ka theksuar Kurti.
Prezente në Kalludër qe edhe zëdhënësja e Prokurorisë Speciale, Arbnora Luta.
Ajo bëri të ditur se janë lëshuar disa për zhvarrosje.
“Kjo është një proces i ndjeshëm dhe kompleks. Është rezultat i një pune disa vjeçare të Policisë dhe Prokurorisë Speciale. Deri më tani janë bërë mbi 10 urdhëra për zhvarrosje, krejt kjo në kuadër të veprimeve hetimore që janë ndërmarrë”, ka thënë Luta.
Ndërkohë një ditë më parë, Policia ka bastisur shtëpinë e njërit nga të arrestuarit të hënën si të dyshuar që lidhen me këtë rast në Kalludër, dhe ka sekuestruar prova materiale.