Të martën e tetë nëntorit, në komunën e Gjilanit një person është gjetur pa shenja jete, afër të cilit është gjetur një pistoletë.
Kështu është bërë e ditur në raportin 24-orësh të Policisë së Kosovës, ku theksohet se e njëjta armë dyshohet të jetë përdorur në rastin në fjalë.
Vdekjen e viktimës e ka konstatuar ekipi mjekësor dhe me vendim të prokurorit, trupi i pajetë është dërguar në Institutin e Mjekësisë Ligjore për obduksion.
“Është raportuar se në rrugë është gjetur pa shenja jete viktima mashkull kosovar. Ekipi mjekësor ka konstatuar vdekjen e viktimës. Po ashtu, në afërsi është gjetur dhe konfiskuar në pistoletë që dyshohet të jetë përdorur në rast. Me vendim të prokurorit, trupi i pajetë është dërguar në IML për obduksion”, thuhet në raport.
Rasti është cilësuar si vdekje e dyshimtë.
Ndryshe, në raportin e policisë thuhet se brenda 24 orëve të fundit, Policia e Kosovës ka arrestuar 34 persona.
Pos tyre, 30 të tjerë janë dërguar në mbajtje.