Gjermania i ka dhuruar Forcës së Sigurisë së Kosovës donacion dy kamionë për operacione të menaxhimit të materieve të rrezikshme.
Të njëjtit kamionë kanë vlerën prej rreth 500 mijë eurosh.
Kështu ka bërë të ditur ministri i Mbrojtjes, Ejup Maqedonci, i cili ka thënë se donacionin e kanë pranuar nga ambasadori gjerman në Kosovë, Jorn Rohde.
Maqedonci është shprehur se Republika Federale e Gjermanisë ka mbështetur në vazhdimësi zhvillimin e FSK-së.
“Sot, nga ambasadori Rohde pranuam si donacion dy kamion për operacione të menaxhimit të materieve të rrezikshme në vlerë prej rreth 500 mijë euro, ndërsa deri në fund të këtij viti pritet që donacioni i pranuar nga shteti gjerman të arrin vlerën prej tre milionë e nëntëqind mijë euro”, ka shkruar ministri në Facebook.
Maqedonci ka shprehur mirënjohje për bashkëpunimin dhe mbështetjen që gjithmonë Republika Federale e Gjermanisë i ka ofruar Kosovës.