Ministri i Mbrojtjes, Armend Mehaj, ka njoftuar se policia ushtarake gjermane ka trajnuar për një javë policinë ushtarake të Kosovës.
Me anë të një postimi në llogarinë e tij në Facebook, Mehaj ka theksuar se ky trajnim u realizua në vazhdën e partneritetit të ngushtë dhe planit të bashkëpunimin bilateral ushtarak në mes të forcave të të dy vendeve.
“Policia ushtarake gjermane trajnon policinë tonë ushtarake në shkathtësitë e mbrojtje së afërt”, thuhet në njoftim.
Sipas Mehajt, trajnimi njëjavor u ka mundësuar policëve ushtarakë që të ngritin nivelin e përgatitjes në taktikat dhe teknikat e mbrojtjes së afërt të personave shumë të rëndësishëm (VIP).
“Mirënjohje dhe falënderim i thellë për Ministrinë e Mbrojtjes dhe Forcat e Armatosura të Gjermanisë për gjithë mbështetjen e madhe në ngritjen dhe zhvillimin e aftësive dhe kapaciteteve operacionale të FSK-së”, shtoi Mehaj.
Ndryshe, KFOR-i kishte bërë të ditur se nga 27 shtatori deri më 2 nëntor të këtij viti, Forca e Kosovës e udhëhequr nga NATO (KFOR) do të kryejë një stërvitje rutinë me një nga njësitë e tij, me ç’rast do të bëhet një rritje e përkohshme e numrit të trupave në terren.
Përmes një komunikate për media, KFOR-i ka bërë të ditur se një kontigjent ushtarak nga Mbretëria e Bashkuar do të arrijë në Kosovë më 11 shtator, për aktivitetet e njohjes dhe integrimit me asetet dhe personelin e KFOR-it përpara stërvitjes.
“Një kontingjent ushtarak nga Mbretëria e Bashkuar do të arrijë në Kosovë më 11 shtator për aktivitetet e njohjes dhe integrimit me asetet dhe personelin e KFOR-it përpara ushtrimeve”, shkruan KFOR.
Aktivitetet stërvitore të njësive do të bëhen me qëllim të ruajtjes së nivelit të lartë të gatishmërisë e njëherësh, edhe për ruajtjen e një mjedisi të sigurt.
Përfundimi i stërvitjes shënon edhe largimin e kontigjentit ushtarak nga Kosova.