Gjermania ka zgjeruar praninë ushtarake në KFOR për afro 400 ushtarë, sipas një rezolute të kaluar në Bundestag të mërkurën.
Aktualisht në misionin paqeruajtës të NATO-s në Kosovë, KFOR, shërbejnë 80 ushtarë gjermanë, i cili numëron personel ushtarak prej rreth 3 mijë e 700.
Me këtë vendimi Gjermania bëhet kontribuesja e tretë më e madhe në KFOR, pas Italisë e SHBA-së.
Thomas Hitschler, sekretari i shtetit në ministrinë gjermane të mbrojtjes, ka deklaruar se mbështetja dhe përkushtimi i tyre me njerëzit në Kosovë dhe në rajonin e Ballkanit Perëndimor, është i rëndësishëm tani në një kohë lufte brutale në mes Evropës.
“Përkushtimi ynë në terren me njerëzit në Kosovë dhe në përgjithësi me njerëzit në rajonin e Ballkanit Perëndimor është më i rëndësishëm se kurrë këto ditë. Sepse ne jemi dëshmitarë të një lufte brutale në mes të Evropës”, ka thënë Hitschler, raporton Euractiv, transmeton Portali D.
Ky zgjerim dhe shtyrje e mandatit pritet të ketë kosto rreth 7 milionë euro.
“Rusia gjithmonë ka pasur interesim të konsiderueshëm për të destabilizuar rajonin. Kjo gjithmonë është mënyrë për të ushtruar presion ndaj Bashkimit Evropian”, ka thënë Hitschler.
Në mocion për të zgjeruar operacionin ceket mundësia e eskalimit të situatës, veçanërisht në veri të Kosovës.
Serbia mbetet një nga aleatët më të afërt të Rusisë në rajon, pasi qeveria e presidentit Aleksandar Vuqiç deri më tani ka refuzuar të miratojë sanksione kundër Rusisë pavarësisht thirrjeve të përsëritura nga Bashkimi Evropian.