Gjuha shqipe, nga tani do të mësohet edhe në Universitetin e Harvardit në Shtetet e Bashkuara të Amerikës, një ndër universitetet më prestigjioze në botë.
Një gjë të tillë e ka bërë të ditur, Faton Limani, i cili punon si administrator në këtë universitet.
Sipas tij, lënda e gjuhës shqipe do të ofrohet gjatë tërë vitit në tri nivele, njohuri fillestare (elementary), njohuri bazike (intermediary) dhe niveli i avancuar (advanced), në Departamentin e Letërsisë Krahasuese.
“Lënda e gjuhës shqipe do të ofrohet gjatë tërë vitit në tre nivele – njohuri fillestare (elementary), njohuri bazike (intermediary) dhe niveli i avancuar (advanced) në Departamentin e Letërsisë Krahasuese”, ka shkruar Limani.
Mësimi i gjuhës shqipe në Universitetin e Harvardit, Limani ka deklaruar se është mundësuar në bashkëpunim me kolegen e tij Eva Stathi Misho.
“Sot kam kënaqësinë të ndaj me ju një lajm shumë të gëzueshëm sa i përket gjuhës sonë shqipe. Në bashkëpunim me bashkëkombësen dhe kolegen Eva Stathi – Misho kemi arritur që të fusim lëndën e gjuhës shqipe si lëndë zgjedhore për herë të parë në Universitetin e Harvardit për të gjithë studentët e të gjitha niveleve” ka shkruar Limani në rrjetin social Facebook, transmeton Portali D.
Gjuha shqipe mësohet dhe studiohet në disa universitete dhe qendra albanologjike në botë. Vendi që ka më shumë grup pedagogësh të gjuhës shqipe është Italia, aty ku janë arbëreshët.
Katedra më e vjetër e gjuhës shqipe është ajo e Universitetit “Lorientale” në Napoli, pastaj në Kalabri në Kozencë, në Sicili, në Palermo, në Leçe, në Romë, në Venecia.
Ndërkohë, gjuha shqipe përveç që mësohet si gjuhë, ajo mësohet edhe në aspektin akademik, që u shërben studiuesve të huaj për hulumtime shkencore, historike e kulturore.
Gjuha shqipe është ndër më të vjetrat në Evropë dhe madje edhe në botë, e cila konsiderohet se është unike dhe se nuk ka ngjashmëri me gjuhët e tjera.