Kryetari i Kuvendit të Kosovës, Glauk Konjufca, ka pritur në takim presidentin e Malit të Zi, Milo Gjukanoviq, i cili ka rikonfirmuar mbështetjen e Malit të Zi për anëtarësimin e Kosovës në Këshillin e Evropës.
Në komunikatën e lëshuar për media nga zyra e kryeparlamentarit, thuhet se në takim është diskutuar për aktualitetin politik, zhvillimet në rajon, agresionin rus në Ukrainë si dhe për thellimin e bashkëpunimit ndërshtetëror dhe shtimin e intesitetit të aktiviteteve ndërparlamentare midis dy vendeve.
“Me rastin e vizitës së tij të parë në Kosovë, Gjukanoviq e falënderoi kryetarin Konjufca për pritjen dhe konfirmoi mbështetjen e Malit të zi për anëtarësimin e Kosovës në KiE dhe organizatat e tjera ndëkrombëtare”, thuhet në njoftim.
Gjatë këtij takimi, Konjufca ka shprehur mirënjohjen për mbështetjen e presidentit Gjukanoviq dhe Malit të Zi.
“Forcimi i mëtejmë i raporteve të ndërsjella fqinjësore është një kontribut shtesë për stabilitetin në Ballkan dhe përspektivën e përbashkët euroatlantike”, vijon njoftimi.
Po ashtu, Gjukanoviq ka shprehur domosdoshmërinë e integrimit të të gjitha shteteve të Ballkanit Perëndimor në Bashkimin Evropian.
Ndërkaq, që të dy i kanë vlerësuar të shkëlqyera marrëdhëniet ndërshtetërore dhe kanë shprehur përkushtimin për avancimin e bashkëpunimit me interes për të dy shtetet.