Ambasadori i Serbisë në Shtetet e Bashkuara të Amerikës, Marko Gjuriq, ka bërë të ditur se në një bisedë me këshilltarin e lartë të Departamentit Amerikan të Shtetit, Derek Chollet, i ka thënë atij se SHBA-ja synon të ndërmarrë hapa konkretë drejt formimit të Asociacionit të Komunave me Shumicë Serbe.
Kështu është shprehur Gjuriq në një intervistë për mediumin Euronews Serbia.
“Ai më tha se Amerika synon të ndërmarrë hapa shumë seriozë drejt formimit të Asociacionit. Ata e kanë udhëhequr procesin drejt saj, jo me ritmin dhe as afër dinamikës që do të donim. Dua ta kujtoj faktin se Amerika as formalisht nuk është garantuese dhe as nënshkruese e Marrëveshjes së Brukselit, këtë duhet ta kishte bërë BE-ja 10 vjet më parë”, ka thënë ai.
Gjuriq ka përmendur edhe deklaratën e të deleguarit special të SHBA-së për Ballkanin Perëndimor, Gabriel Escobar, i cili kishte thënë se “Asociacioni do të formohet me ose pa Kurtin”.
“Do të shohim si do të realizohet, kërkesat e serbëve janë shumë racionale, që Kurti të tërheqë formacionet ilegale nga Veriu dhe të shohim hapa konkretë të formimit të Asociacionit”, shtoi ai.
“Si SHBA-ja dhe BE-ja kanë mekanizma që shpresoj se do t’i përdorin në një masë shumë më të madhe në periudhën e ardhshme për të joshur Kurtin dhe qeverinë atje në një kurs të vërtetë të normalizimit të marrëdhënieve”, ka shtuar ai.