Gjykata Kushtetuese dhe Agjencia e Kosovës për Inteligjencë i kanë mohuar dhe hedhur poshtë raportimet se drejtori i kësaj të fundit është denoncuar për shantazhim të gjyqtarëve të Kushtetueses.
Përmes një komunikate, Gjykata Kushtetuese ka thënë se ajo është e pavarur në ushtrimin e funksionit të saj.
“Gjykata Kushtetuese e Republikës së Kosovës, mohon pretendimet e shkrimit të publikuar nga portali Paparaci.com, të dielën, më 16 prill 2023, me titull: “Shefi i AKI-së denoncohet për shantazh të gjyqtarëve kushtetues“. Gjykata Kushtetuese është plotësisht e pavarur në ushtrimin e funksioneve të saj kushtetuese. Ajo gjithashtu, në kuadër të kompetencave kushtetuese dhe atyre të përcaktuara në ligjet e aplikueshme, ka bashkëpunim me të gjitha institucionet e Republikës së Kosovës”, thuhet në komunikatë.
Në anën tjetër, AKI-ja ka theksuar se shkrime të tilla e dëmtojnë kredibilitetin e saj dhe provojnë të mashtrojnë opinionin.
“Agjencia e Kosovës për Inteligjencë hedh poshtë dhe i cilëson të pavërteta pretendimet e artikullit të publikuar në paparaci.com, me titullin “Shefi i AKI-së denoncohet për shantazh të gjyqtarëve kushtetues”.
Në këtë komunikatë thuhet se AKI, në bazë të detyrave të përshkruara me ligj, bashkëpunon me të gjitha institucionet në Republikën e Kosovës, përfshirë edhe Gjykatën Kushtetuese.
“Pretendimet e shkrimit në fjalë, provojnë që të mashtrojnë opinionin publik dhe njëkohësisht të dëmtojnë kredibilitetin e AKI-së”, thuhet në reagimin e AKI-së.
Ndryshe, portali “paparaci.com” të dielën e 16 prillit gjatë ditës ka raportuar se drejtori i AKI-së është denoncuar për shkak të shantazheve të tij ndaj disa gjyqtarëve të Gjykatës Kushtetuese.