Gjykata Themelore në Prishtinë ka vendosur masën e paraburgimit ndaj dy të dyshuarve, (të mitur), për vdekjen e 18-vjeçarit nga Podujeva.
Lajmin për Portalin Dukagjini e ka konfirmuar zëdhënësja e kësaj gjykate, Mirlinda Gashi.
Inspektorati Policor i Kosovës (IPK) ka bërë të ditur se ka nisur një hetim preliminar ndaj Policisë së Kosovës në lidhje me rastin e vdekjes së 18-vjeçarit nga Podujeva.
Lulzim Fejzuallahu nga Podujeva vdiq, pasi dyshohet se u godit me veturë e më pas u rrah brutalisht më 14 janar, nga dy të mitur në rrugën “Drenica”.
Ai ishte dërguar për trajtim në spital pasi mori lëndime të rënda, por nuk mundi t’i përballojë plagët e marra.
Ndryshe, sot Inspektorati Policor i Kosovës ka bërë të ditur se ka nisur një hetim preliminar ndaj Policisë së Kosovës në lidhje me rastin e vdekjes së 18-vjeçarit nga Podujeva.
Në një përgjigje për Dukagjinin, IKP-ja ka thënë se hetimi preliminar përfshin, përveç të tjera, edhe grumbullimin e informacioneve shtesë rreth veprimeve të policisë, si dhe sigurimin e të gjitha shkresave lidhur me këtë rast.
“Duke iu referuar kërkesës suaj, ju informojmë se lidhur me këtë rast Inspektorati Policor i Kosovës, sipas detyrës zyrtare, ka filluar një hetim preliminar që përfshin përveç tjerash edhe grumbullimin e informacioneve shtesë rreth veprimeve të policisë, si dhe sigurimin e të gjitha shkresave lidhur me këtë rast. Veprimet tjera do të ndërmerren varësisht nga të gjeturat e hetimit preliminar dhe autorizimeve ligjore të IPK-së”, thuhet në përgjigjen e IPK-së.