Dragisha Millenkoviq, i arrestuar të mërkurën në Graçanicë nën dyshimet se ka kryer krime lufte në Kosovë gjatë viteve 1998-1999, është sjellë para Gjykatës së Prishtinës.

Tashmë ka filluar seanca për caktim të masës së paraburgimit ndaj Dragisha Milenkoviq.

Policia ka njoftuar se ka zhvilluar hetime lidhur me krimet e kryera gjatë periudhës së luftës në Kosovë (1998- 1999), ku përmes rrugëve hetimore-operative ka pranuar informacion për të dyshuarin mashkull kosovar serb me iniciale (D. M.) si pjesëmarrës në këto krime.

“Ndaj të njëjtit janë siguruar prova për ekzistimin e dyshimit të arsyeshëm se në bashkëkryerje edhe me pjesëtarë të tjerë, gjatë periudhës së luftës në Kosovë në cilësi të personave zyrtar (gardian të burgut) në Prishtinë dhe në paralelen e ndarë nga Prishtina konkretisht në burgun e Lipjanit, në mënyrë sistematike, dyshohet se kanë ushtruar torturë, dhunë fizike, psikike, keqtrajtime dhe maltretime çnjerëzore dhe të skajshme për jetën ndaj të burgosurve shqiptarë”,  thuhej në komunikatën e e Policisë.

Për shkak të këtij arrestimi, të mërkurën dhe të enjten një i grup i caktuar i qytetarëve kanë protestuar në Graçanicë.

Serbët bllokojnë rrugët në Graçanicë pasi polica arrestoi një serb për krime lufte