Këtë të premte, Zyra e Prokurorit të Specializuar (ZPS) ka njoftuar për arrestimin e dy personave, të cilët dyshohen për pengimin e drejtësisë dhe frikësimin e një dëshmitari.
ZPS-ja ka njoftuar se Ismet Bahtjari dhe Sabit Januzi janë arrestuar në bazë të një urdhërarresti të lëshuar nga Dhomat e Specializuara të Kosovës (DHSK), dhe se ata janë dërguar në qendrën e paraburgimin të DHSK-së në Hagë.
Sipas njoftimit, Bahtijari dhe Januzi dyshohen se u përpoqën ta “bindnin një dëshmitar të mos dëshmonte” në gjyqin e Dhomave të Specializuara.
“Bahtjari dhe Januzi u arrestuan në lidhje me krime kundër administrimit të drejtësisë, përfshirë frikësimin gjatë procedurave penale, sipas nenit 387 të Kodit Penal të Kosovës (KPK) 2019, Kodi nr. 06/L-074, dhe pengimin e personave zyrtarë në kryerjen e detyrave zyrtare brenda kuptimit të nenit 401(1), (2) dhe (5) të KPK-së, në shkelje të nenit 15(2) të Ligjit nr. 05/L-53 për Dhomat e Specializuara dhe Zyrën e Prokurorit të Specializuar. Gjykatësi i Procedurës Paraprake ka vendosur se ka dyshime të mirë-bazuara se z. Bahtjari dhe z. Januzi u përpoqën të bindin një dëshmitar që të mos japë dëshmi në procedurat e Dhomave të Specializuara”, thuhet në njoftimin e Zyrës së Prokurorit të Specializuar (ZPS).
Tutje në njoftim thuhet se në arrestimine Bahtijarit dhe Januzit ka ndihmuar Misioni i Bashkimit Evropian për Sundimin e Ligjit në Kosovë (EULEX) dhe Policia e Kosovës.
“Zyra e Prokurorit të Specializuar e merr jashtëzakonisht seriozisht frikësimin e dëshmitarëve, hakmarrjen ndaj dëshmitarëve, dhe pengimin e drejtësisë, dhe do të vazhdojë të hetojë e ndjekë penalisht cilindo dhe të gjithë ata që përfshihen në çdo rast”, thuhet tutuje në njoftim.